泰國七七七爸爸師機 的 BLOG

撮要: 已經好耐冇係公眾場所聲嘶力竭鬧人既蘿打咩, 居然今日係會場內破戒, 你地自己判斷呢個節目應唔應該去啦!!

-----------------------------------------------------

今日相約左陳一既好朋友澄澄去參觀在機場博覽館舉行既「老襯動物農莊」, 一朝早起身就o拿o拿淋準備, 希望11點開始前去到。

開始時, 一切都頗為順利, 買飛﹑入場都總算冇乜排過隊。 入場後, 見到一個 counter 大字寫著「售票處」, 就已經心知不妙, 明明比左錢入黎, 又再售票??  原來入場之後, 有一堆小動物給小朋友餵飼, 包括: 兔仔, 龜 及 山羊bb。。。 當然, 呢d平時難得既機會, 依家比埋冷氣你嘆住玩, 咁就擺到明「唔屈你, 屈邊個呀??」 呢個道理我好明白, 亦好心甘命抵比佢屈, 因為自從上次新加坡之旅後, 知道陳一好鍾意同小動物玩, 所以問都冇問就買左一包草同一樽奶奶, 準備餵羊咩咩~~~~   (包草數埋唔夠50條, 應該係用燕窩種, 所以值 $40蚊!!  支唔夠一安既奶, 應該係"宮崎絕版種牛媽媽"d奶度提煉出黎, 所以大o拿o拿成$20支)

好, 買完咋咋聲不顧儀態咁衝入去餵奶奶先!!  點知成場廿幾三十個小朋友 (已經叫少人架啦), 得兩隻羊咩咩, 搞到個個都好似"捉雞仔"咁, 周圍撲黎撲去, 都係為左想"隊"支奶比羊BB。。。

o拿, 戲肉到啦!!

抱住陳一東奔西跑,  大汗淋漓, 連羊咩屎都未見到既蘿打咩, 好不容易比佢攝到一個好位, 諗住隻羊bb就黎走埋黎時, 可以比阿囡餵到佢食奶奶。 當陳一準備伸手出去, 我隻手指準備按下相機快門既重要一刻, "pu佢阿嬤", 圍欄入面個工作人員姐姐居然將羊咩咩一手抱起, 然後搬去另一個方向比另一個小朋友餵。

嘩, 個下既蘿打咩, 真係有生以黎, 見佢鬧人鬧得最甘既一鑊!!! (咁當然鬧我就唔止咁啦~~~ )

「你有冇搞錯呀?? o岩o岩我阿女可以餵到時, 你一手就抱走佢比第二個餵, 人人都係度等隻羊行過黎輪住餵架啦, 點解佢有特權你抱比佢餵呀??」

個條唔識死字點寫既"暑期工"答:「哦, 因為佢叫我抱過去比佢嘛!!」

「我就要抱住個囡周圍搵隻羊, 你一句唔該都冇就抱Q走佢, 你地點做野架?」

依然覺得自己冇乜唔o岩既磨轆答:「咁你都可以叫我抱比你餵既~~~」

個下真係想"中"佢一鑊!!  人家叫你去仆街又唔見你咁聽話??

 你抱走冇問題, 問題係, 你都可以等人家小朋友餵完, 好聲好氣話:「好啦, 輪到個邊既小朋友餵一陣先!!」, 然後話知你抱佢番屋企啦~~~

--------------------------------------------

算!!  就當我地兩個大人, 唔想恰你一個擺明係暑期工既妹妹仔。點解知佢係暑期工???  一睇佢抱住隻羊仔, 隻羊仔就黎勒死個樣就知佢跟本唔係熟手技工啦!!  其實我真係覺得呢個展覽會, 不但比唔到小朋友要懂得愛護動物既訊息, 反而令到一眾可憐既小動物受到無謂既虐待!!!!

舉一個例子, 有個小朋友餵唔到奶奶, 佢身邊既婆婆就一手o拿住掛起羊咩咩頸上既響鈴, 然後扯佢埋去個小朋友前面比佢餵。 嘩, 個下我真係想衝過去打柒個阿婆!!!   (阿婆都打??? 佢連羊bb都虐待, 係我眼中已經禽獸不如!!)

再多既例子不用多講, 驚我越講越有衝動想打電話去「愛護動物協會」投訴個活動, 然後再係 facebook 發起萬人圍堵博覽館~~~

----------------------------------------------

最後餵到火都黎埋, 索性唔餵, 叫陳一摸下羊咩咩就去睇第二樣!!!

之後, 見到場既另一面有馬仔騎, 梗係巴巴聲飛過去啦, 趁人家仲同羊咩咩玩緊捉雞仔時, 冇咁多人嘛~~~

點知原來騎馬仔要4歲以上先可以, 仲要簽晒生死狀。 唉, 怪就怪自己個女未夠稱啦~~~ 唯有轉移目標, 去同隔離既熱鬥小馬影番張相!!  又盛惠四十個大洋~~~  見到陳一悶悶不樂既樣, 唯有豁出去, 影番張全家幅啦!!!   咁當然又係唔會比你用自己既相機影啦, 但工作人員個理由又好科學既, 驚我地有用閃光燈, 令馬仔發狂~~~~

---------------------------------------------

玩到已經冇乜癮既陳氏家族, 突然收到由介紹是次活動既澄澄媽咪(蘿打咩舊同學)既電話, 話已經入左黎, 想搵我地一聚。

見到面, 我地兩個已經一輪咀"有彈冇讚", 搞到人家唯有兜一兜, 話唔睇動物唔緊要, 都係諗住比佢個女黎玩下跳彈床啫!!   我同蘿打咩都唔敢再多講, 只係話:「哦, 咁好啦, 我地出去食飯先啦!!」  但其實心入面已經擔心緊:「$30玩5分鐘喎, 仲要4歲以上先玩得, 你地唔好抱咁大希望喎~~~」

最後, 我地食食下飯既時候, 見到澄澄一家人已經走番出黎, 相問之下, 原來最後佢地乜都冇玩到就走番出黎!!!   唉, 難為爸爸佢仲特登請假黎呀!!!!!

----------------------------------------------

最後要講既, 如果你想帶你既小朋友去認識小動物, 香港其實有好多地方都可以去, 如 動植物公園, 嘉道理農場, 等等.....  而如果各位有良知既話, 希望你地唔好因為一己既私慾, 而令一眾小動物受到虐待!!!